Më datën 22.10.2021 në mbledhjen e Komitetit Drejtues of CFPA-E (Confederation of Fire Protection Associations Europe) që u zhvillua në Athinë, u shqyrtua kërkesa e shoqatës AFPRA dhe më pas u vendos anëtarësimi saj në këtë konfederatë. Në këtë eveniment morën pjesë drejtuesit e shoqatës AFPRA kryesuar nga z Alban Laçi dhe z Vaso Peja të cilët prezantuan historikun, arritjet, anëtarësinë si dhe objektivat e saj.

Konfederata e Shoqatave Europiane të Mbrojtjes nga Zjarri (CFPA-E) është organizata më përfaqësuese e shoqatave të mbrojtjes nga zjarri ne Europë, me fokusin primar shkëmbimin e njohurive dhe të kuptuarit e çështjeve që lidhen me shkencën e zjarrit, parandalimin dhe mbrojtjen nga zjarri, sigurinë dhe rreziqet e tjera të lidhura, ku Shqipëria për herë të parë është pjesë e saj në nivel organizate kombëtare nëpërmjet shoqatës AFPRA.

Bashkëpunimi i AFPRA-s me CFPA-E do të jetë afatgjatë dhe shumë shpejt do të fillojë publikimi i udhëzimeve të kësaj organizate sipas standartit europian, në gjuhën shqipe, për të vazhduar më pas me trajnimet e harmonizuara në fushën e mbrojtjes nga zjarri, parandalimit dhe sigurisë.

Gjatë ditëve të trajnimit nga VAFFFA- Austri, shoqata AFPRA organizoi nje vizitë në Stacionin e MZSH-së të Bashkisë Kuçovë ku u njoh nga afër me sfidat e këtij shërbimi në këtë bashki. Morën pjesë në këtë aktivitet z Alban Laçi kryetari i AFPRA-s, z Ferdinand Pulaha drejtor i këtij shërbimi, z Enea Kureta komandant shërbimi, z Ilir Xhanari ish-drejtues i këtij shërbimi në këtë stacion si dhe miqtë austriakë me z Josef Schwarzmannseder nënkryetar të VAFFFA-s etj.

Efektivit të MZSH-së Kuçovë ju dhuruan nga shoqata AFPRA, pajisje të ndryshme kundrazjarrit për të përballuar sfidat e përditshme të këtij shërbimi.

AFPRA në bashkëpunim me shoqatën VAFFFA- Austri bëri të mundur ardhjen e disa trajnuesve nga ekipi zjarrfikës austriak i qytetit te Grieskirchen- Austri. Në këtë trajnim morën pjesë 23 efektivë të përzgjedhur nga bashkitë Tiranë, Gramsh, Kamëz etj, të cilët patën mundësinë të njiheshin nga afër me menyrën e veprimit me fokus tek mbrojtja personale si dhe të vepronin praktikisht sipas kurrikulave të trajnuesve austriake.

Mbas këtij trajnimi shoqata austriake VAFFFA në bashkëpunim me FREIWILLIGE FEUERWEHR-ST. FLORIAN AM INN i dhuroi shoqatës tonë perfaqesuar nga kryetari saj z Alban Laçi, një mjet zjarrfikës i cili do të përdoret për trajnimin e efektivave të MZSH-së kudo në Shqipëri.

Me rastin e përfundimit të kursit bazë të trajnimit zjarrfikës pranë Akademisë së Sigurisë, në mjediset e Qendrës së Trajnimit Zjarrfikës u organizua ceremonia e diplomimit të efektivëve të parë që morën pjesë në këtë kurs.

Pjesë e të ftuarve në këtë ceremoni ishin Kryetari i AFPRA-s z Alban Laçi, Anetari Nderit z Fran Gega, Drejtori i MZSH-së z Alfred Kristuli dhe z Shkëlqim Goxhaj, stafi trajnues me z Arben Cara etj.

Në ceremoni midis të tjerash u vlerësua lart kontributi i shoqatës AFPRA në mbështetjen e këtij kursi me pajisjet e nevojshme për trajnimin e efektivave zjarrfikës.

Të pranishmëve si dhe përfaqësuesve të projektit të sigurisë të EU zj Tina Koivuniemi dhe të Akademisë së Sigurisë së Estonisë zj Hali Allas etj, të cilët ishin gjithashtu pjesë e kësaj ceremonie, iu prezantua aktiviteti i shoqatës AFPRA si dhe u diskutua mundësia e vendosjes së një ure bashkëpunimi në funksion të forcimit të kapaciteteve trajnuese.

Sot me rastin e fillimit të kursit të parë për Asistentët Zjarrfikës në Akademinë e Sigurisë, shoqata AFPRA në kuadër të Memorandumit të Bashkëpunimit me Drejtorinë e Përgjithshme të MZSH-së në bashkëpunim me shoqatën VAFFFA – Austri mundësoi pajisjen me bazën materiale të nevojshme për trajnimin e efektivit. Në ceremoninë e rihapjes së kësaj qendre stërvitore morën pjesë z Alban Laçi Kryetar i shoqatës AFPRA, z Bilbil Mema Drejtor i Akademisë së Sigurisë, z Alfred Kristuli Drejtor i Përgjithshëm i MZSH-së, z Arben Cara Drejtor i kësaj Qendre si dhe efektivët e parë që do trajnohen.